الي الأهالى اللى رافضين يدفنوا الميتين ” بكورونا “
روح الميتين بتبعتلكم القصيدة دى
………………………………………………………………………….
” أنا اللى كان منايا “
وييجى الموت منلاقيش
حتة أرض
تتلم العضام فيها
ولا إيد حنيّنه
تريّح
بقايا جسمنا المهدود
كل القلوب القاسية خايفه
وأنا حفرتى أوسع
من براح دينتكم المغرورة
كل اللى حاضر
بيصور الصورة
والكاميرا من مشهد حصار دفنتى
مذعورة
شريط حداد على قلب أسود
وروح مهجورة
مين اللى سامع زىّ
صوت الدود
مين اللى حاسس باشتياقه لبدنى
ارمونى وسيبونى
يمكن يطبطب على عضمى
وانا باشتكيله منكم
الأرض قلقانه من طول انتظارى
ارمونى وسيبونى
أنا عاوز أفضفض للتراب
بحاجات كتير عنكم
الجسم ميت والروح لسه موجوعه
يا غراب دفن صاحبه
قدام عيون ابن ادم
الدرس اتنسى
والعضام متوزعة
شفينا لونك فى القلوب
ونسينا بياض روحك
خربشت بطن الأرض
باست جبين صاحبك
واحنا خربشنا وشوش بعض
ودوسنا بقساوة روحنا على بعض
وأنا اللى كان منايا
كتاف تشيل وجعى
وقلوب أبيض من بياض كفنى
وايدين تبل ريق الروح
قبل التراب ما يحضنى
أنا اللى كان منايا
أموت بينكم
موش عاوزه “فاتحكتم “
كل اللى غيركم
لسه قلوبهم صاحية
حيصلوا عليا
ويرفعونى لفوق !!
الشاعر أحمد عبد الحكم الأمين
